Словенечкиот премиер Јанез Јанша вчера присуствуваше на свеченост по повод Денот на државноста на Украина во Киев. Во обраќањето тој нагласи дека полноправното членство на Украина во Европска Унија станува реалност, а пораката беше пренесена и преку официјалниот профил на словенечката влада на платформата Икс.
Пред граѓаните собрани на плоштадот „Св. Михаил“ во Киев, Јанша ја истакна важноста на правичниот мир, кој, според него, подразбира и одговорност за стореното зло, бидејќи „неказнетото зло секогаш се враќа“. Тој додаде дека меѓународната поддршка за Украина денес е значително поголема и дека нејзиното приближување кон полноправно членство во Европска Унија „веќе станува реалност“.
Јанша потсети и на својата посета на Киев во март 2022 година, набргу по почетокот на руската инвазија, кога заедно со тогашниот премиер на Полска Матеуш Моравјецки и тогашниот чешки премиер Петер Фијала, како први странски лидери, јавно ја изразија поддршката за Украина. Во знак на благодарност, на плоштадот пред украинскиот парламент е поставена спомен-плоча со нивните имиња, се наведува во објавата на Икс.
Пред почетокот на свеченоста, словенечкиот премиер и другите лидери положија цвеќе пред ѕидот на сеќавањето за украинските војници загинати во текот на руската агресија. По настанот, во претседателската палата тие учествуваа на петтата средба на врвот „Украина – Југоисточна Европа“, а Јанша имаше и средба со украинскиот претседател Володимир Зеленски.
Меѓу учесниците беа претседателката на Европската комисија Урсула фон дер Лајен, хрватскиот премиер Андреј Пленковиќ, претседателот на Романија Никушор Дан, претседателката на Молдавија Маја Санду, како и претседателите на Албанија и Србија Бајрам Бегај и Александар Вучиќ. Некои држави, меѓу кои Северна Македонија и Црна Гора, беа претставени од своите министри за надворешни работи. Бугарија исто така беше претставена од министерката за надворешни работи Велислава Петрова-Чамова.