Вакцинацијата против сезонски грип во земјава ќе започне во вообичаениот термин, меѓу 16 и 25 октомври, и покрај глобалните задоцнувања во производството и пропаднатиот првичен тендер, информираше министерот за здравство, Сашо Клековски.
До доцнење на глобално ниво дојде откако Светската здравствена организација (СЗО) оваа година направи невообичаена чекор и ги промени сите три соја во препорачаниот состав на вакцината за северната хемисфера.
„На објавениот тендер оваа година не се пријави ниту еден понудувач, но Министерството веднаш презеде мерки за нивно обезбедување по друг пат. Од планираните 80.000 дози, 56.000 вакцини се веќе обезбедени или се во постапка на обезбедување, а активно се работи и на набавка на преостанатиот дел“, изјави министерот Клековски.
Бесплатната вакцинација и оваа сезона е наменета за ризичните и приоритетните категории граѓани:
- Лица над 65 години
- Хронично болни лица
- Бремени жени
- Здравствени работници
Од Министерството за здравство порачуваат дека граѓаните ќе бидат навремено информирани за точниот датум за почеток на процесот, како и за начинот на закажување термини.