По повеќе од пет децении пауза во човечките мисии кон Месечината, светот повторно сведочи на историски чекор во вселенските истражувања. Четворица астронаути моментално се на патување околу Земјиниот сателит во рамки на мисијата Артемис II, а нивното враќање се очекува за десетина дена од лансирањето.
Мисијата започна на 1 април 2026 година од Kennedy Space Center, кога НАСА успешно ја лансираше ракетата Space Launch System со капсулата Орион. Во неа се наоѓа четиричлен екипаж составен од астронаутите Рид Вајсман, Кристина Кох и Виктор Гловер од САД, како и Џереми Хансен од Канада.
За разлика од историските мисии од програмата Аполо, ова патување нема за цел слетување на Месечината, туку претставува клучен тест за системите што ќе се користат во идните мисии со човечки екипаж.
По почетните подготовки во орбитата околу Земјата, леталото изврши маневар за напуштање на орбитата и се упати кон Месечината. Во текот на патувањето, капсулата периодично ги активира моторите за да ја одржи прецизната траекторија, додека екипажот спроведува низа технички тестови.
Еден од најзначајните моменти на мисијата се очекува на 6 април, кога „Орион“ ќе изведе блиско прелетување покрај Месечината, на оддалеченост од околу 10.000 километри. Во тој период, комуникацијата со Земјата ќе биде привремено прекината, но астронаутите ќе имаат можност да снимаат фотографии и видеа од далечната страна на Месечината.
По прелетот, леталото ќе ја искористи гравитацијата на Месечината за враќање кон Земјата, при што ќе се изведат дополнителни тестови, вклучително и рачно управување и проверка на заштитата од радијација.
Финалната фаза од мисијата ќе биде повторното влегување во Земјината атмосфера, кога капсулата ќе се соочи со екстремни температури од околу 3.000 степени Фаренхајт. Како и при претходните мисии, се очекува краткотраен прекин на комуникацијата поради создавање плазма околу леталото.
Слетувањето е планирано за 10 април во Тихиот Океан, во близина на Калифорнија, каде што екипажот ќе биде преземен од брод на американската морнарица.
Мисијата има и силно симболично значење – Виктор Гловер ќе стане првиот Афроамериканец што ќе се доближи до Месечината, Кристина Кох првата жена во ваква мисија, а Џереми Хансен првиот Канаѓанец што учествува во лет околу Месечината.
Иако станува збор за тест мисија, „Артемис II“ претставува важен чекор кон новата ера на човечко истражување на Месечината и подготовка за идните мисии кои треба повторно да донесат астронаути на нејзината површина, најрано до 2028 година.