Рускиот министер за надворешни работи Сергеј Лавров денеска изјави дека доколку Европа ја нападне Русија, војната би била „многу кратка“.
„Ако Европа – која секојдневно зборува за подготовки за војна против Русија – ја нападне Руската Федерација, тоа би било сосема поинаква војна и би била многу кратка“, рече Лавров на Меѓународниот фестивал на млади во Екатеринбург, во централна Русија, како што пренесе руската новинска агенција Интерфакс.
Нагласувајќи дека Русија „нема намера да ја нападне Европа“, Лавров изрази надеж дека неговото „предупредување“ сериозно ќе го сфатат земјите и институциите на Европската унија, кои Кремљ ги обвинува за поттикнување на понатамошна ескалација.
Неговата изјава доаѓа во момент кога европските земји ја зајакнуваат својата одбрана.
Британскиот весник „Индипендент“ известува за зголемените тензии меѓу Русија и Европа, толкувајќи го Лавров – долгогодишен сојузник на рускиот претседател Владимир Путин – како некој што „навестил дека конфликтот со Европа не би претставувал тешкотија за Москва“.
Според весникот, Лавров истакнал дека Русија „нема интерес“ да ги напаѓа западните земји, но напоменал дека доколку биде прва нападната, ќе возврати, а исходот би бил брз.
„Русија постојано изјавуваше дека нема да ги напаѓаме западните земји и дека немаме интерес за тоа“, рече тој во Екатеринбург.
„Но, ако Европа, која редовно зборува за подготовки за војна против Русија, ја нападне Руската Федерација, тогаш тоа ќе биде сосема поинаква војна и ќе биде многу кратка“, изјави тој. „Западот одамна избра политика на задржување на Русија“, рече тој, осврнувајќи се на она што го нарече „агресивно“ ширење на НАТО кон руските граници – потег што Русија го наведува како причина за својата инвазија врз Украина. Искусниот министер, според британскиот весник, е познат по своите директни изјави и ја извршува функцијата од 2004 година.
Што изјави полскиот министер за надворешни работи
Весникот Independent пренесува дека полскиот министер за надворешни работи, Радослав Сикорски, во понеделникот изјавил оти Алијансата „брзо“ би ја поразила Русија, истакнувајќи ја „огромната надмоќ“ на полските воздухопловни сили.
„Ако Русија нè нападнеше, а ние се откажевме од воздржаноста, мислам дека би ја поразиле Русија прилично брзо. Имаме огромна надмоќ над Русија во поглед на воздушната моќ“, рече тој.
Весникот денес известува и дека претседателката на Европската комисија, Урсула фон дер Лајен, предложила формирање на Европски совет за безбедност за спротивставување на „хибридните напади“.
Таа изјави дека групата би можела да ги обедини ЕУ и нејзините партнери – вклучувајќи ги Канада, Обединетото Кралство и Норвешка – за да се воспостави „итен безбедносен протокол“.
„На Европа ѝ е потребен сопствен план за дејствување при одговор на хибридни закани“, рече таа за време на својот говор за состојбата на Унијата во Европскиот парламент, осврнувајќи се на таканаречените „хибридни напади“, како што се обидите за саботажа.
„Доколку некоја земја-членка го активира овој механизам, сите земји-членки би се состанале за да координираат европски одговор, со цел да се спречи понатамошна ескалација и да се ублажат последиците“, изјави Фон дер Лајен.
Директорот на ЦИА ја посети Москва минатиот месец
Во вторникот, Данска објави дека руски воен брод испукал сигнални ракети кон еден од нејзините воени хеликоптери без претходно предупредување, додека Москва возврати со тврдење дека дански летала изведувале опасни маневри и прелети во близина на нејзината флота. Минатиот месец, директорот на ЦИА, Џон Ретклиф, оствари ретка и кратка посета на Москва – прва по посетата на неговиот претходник, само неколку недели пред руската инвазија на Украина.
Извори запознаени со случајот изјавија за CBS News и The Wall Street Journal дека Ретклиф отпатувал во Москва за да ја предупреди Русија да не го напаѓа НАТО.
Портпаролот на руското Министерство за надворешни работи, Дмитриј Песков, ги отфрли овие тврдења како „приказни за плашење“, додавајќи дека тие „немаат никаква врска со реалноста“. Тој изјави дека Москва се „соочува со многу агресивна политика од страна на европските земји“.
Минатата година, Путин предизвика загриженост изјавувајќи дека е „подготвен да се бори“ против Европа и нарекувајќи ги тие земји „прасиња“, иако подоцна се повлече од тие зборови, сугерирајќи дека коментарите биле извадени од контекст.
Претходно овој месец, тој упати „злокобно предупредување“ до Обединетото Кралство во врска со неговата поддршка за Украина: „Тоа е тајна, воена тајна“, рече тој кога беше прашан дали Русија разгледува опции за напад врз Обединетото Кралство. Тој додаде дека „сите воени објекти во Украина се наши легитимни цели, без разлика дали се британски или други“, пренесува „Индипендент“.