Литванскиот парламент едногласно одлучи да ја признае војната на Русија против Украина како „геноцид“.
Според веста на Литванската национална радио и телевизија (ЛРТ), во резолуцијата усвоена со 128 гласа „за“, е посочено дека руските воени сили и платеници извршиле „колективни воени злосторства“ на територијата на Украина, особено во Буча, Ирпин, Мариупол, Бородјанка и Хостомел.
Во резолуцијата беше наведено дека војната од големи размери што ја водат руските сили против Украина се смета за „геноцид“ врз украинскиот народ.
Нагласувајќи дека сите сторители треба да одговараат и меѓународната заедница треба да формира Специјален меѓународен кривичен суд за истрага на злосторствата на Русија, во одлуката се вели: „Руската Федерација, чии воени сили намерно и систематски гаѓаат цивилни елементи, е држава која поддржува и практикува тероризам“.