Донесено е решение за запишување на ликвидацијата на подружницата на Меѓународниот републикански институт (IRI) од Вашингтон, САД – Подружница Скопје. Постапката е започната на 1 август 2025 година, врз основа на одлука за престанок со работа донесена на 18 јуни 2025 година.
Како ликвидатор е назначена Илина Мангова, која воедно е и овластено лице за завршување на административните и правните обврски поврзани со затворањето на подружницата. Со ова, досегашните овластувања на Мангова како застапник на подружницата се избришани од Централниот регистар.
Во регистарот е наведено дека сите дејствија поврзани со регистрацијата на IRI во земјава, како и банкарските и финансиските трансакции, морале да бидат претходно писмено одобрени од страна на James John Flukarty, кој е назначен за надзор над процесот.
IRI е американска невладина организација која со години наназад имаше активна улога во поддршка на демократските процеси и граѓанските иницијативи во Северна Македонија. Засега нема официјална изјава од институцијата за причините за затворањето на канцеларијата во Скопје.