На првиот ден од историскиот Самит на НАТО, чиј домаќин е Турција, за триесет и две држави беше приредена свечена вечера во чест на претседателите на држави и премиерите, а менито го осмисли светски признатиот и повеќекратно наградуван турски шеф-готвач Фатих Тутак.
Познатиот шеф-готвач, добитник на најпрестижни признанија во гастрономијата, креираше мени што ги спои традиционалните вкусови со современи техники. Во делот на предјадењата беа послужени пиде од камена печка, путер од Трабзон и мед од Хизан Каракован, зеленчук соте во маслиново масло и карамелизиран јогурт од Денизли.
Како топло предјадење, на гостите им беа сервирани кајсери манти, збогатени со карамелизиран јогурт од Денизли и димена пиперна паста од Ајаш.
Во главното јадење беа понудени две опции. Првата беше лаврак, придружен со тарама, артичока од Урла од сортата Сакъз и листови од лозје од Токат. Втората опција беа бавно готвени говедски ребра со препржен путер од Трабзон, печен модар патлиџан и пилав од фрике со печурки морели.
Завршницата на специјалната вечера во Бештепе беше во знакот на традиционалниот десерт Сутлу Нурие. Десертот беше проследен со пена од антепски фстак, марашки сладолед и бергамот, со што на маса беа обединети различни регионални вкусови на турската кујна. Менито, подготвено за лидерите во рамки на самитот, уште еднаш ја истакна богатата гастрономска култура на Турција пред светската јавност.