На врвот од изборната победа на Студентската листа, славеничка атмосфера ја зафати цела Србија, а граѓаните во повеќе градови масовно излегоа на улиците за да го прослават изборниот резултат.
Славењето во Ниш започна во 20 часот на Централниот трг „Краљ Милан“. Со музика од бината и голема посетеност, граѓаните ја искажаа својата радост и надеж за ново поглавје.
“Мириса на слобода, весело е, луѓето се сакаат. Нема повеќе зло, започнува нов живот”, изјави една од присутните граѓанки.
Пред да започне централното славење, студентите кои го блокираа Нишкиот универзитет упатија апел за поддршка на локалните бајкери. Тие претходно одржаа протест и прес-конференција пред Полициската управа во Ниш поради инцидентите од изминатиот ден, кога тврдат дека биле приведувани додека биле напаѓани од лица во возила без регистарски таблички. Бајкерите најавија дека ќе протестираат секој ден пред полицијата сè додека не добијат одговори, по што му се приклучија на општото славење на тргот.
Нови Сад забележа историска излезност и поддршка за Студентската листа, која освои дури 62,8% од гласовите — резултат каков што досега не забележала ниту една политичка опција во овој град.
Граѓаните излегоа на улиците прославувајќи со песна, традиционално коло и огномети. На прославата први се приклучија земјоделците (паори), кои со своите возила пристигнаа до универзитетскиот кампус, по што огромна колона граѓани се упати кон зградата на Бановина, каде што беше поставена бината.
Во главниот град, фокусот на славењето беше на познатиот трг Славија. Под мотото „Нека пее оваа Славија“, илјадници граѓани се собраа кај споменикот на Димитрије Туцовиќ.
Со ди-џеј кој ја загреваше атмосферата од поставената бина, реката луѓе продолжуваше да пристигнува од сите околни улици, а прославата беше предвидена да трае до доцните полноќни часови.