Единаесет лица загинаа, а 51 беа пренесени во болница по серијата тешки верижни сообраќајни несреќи што утрово се случија на автопатот „Тракија“ во Бугарија, во близина на градот Јамбол.
Во судирите учествувале повеќе од 80 автомобили и товарни возила, поради што автопатот бил затворен во двата правци, на делницата меѓу клучките „Зимница“ и „Кабиле“.
Според бугарските медиуми, во моментот на несреќите имало густа магла, која значително ја намалила видливоста. Точните причини за судирите допрва треба да се утврдат.
Од бугарското Министерство за здравство потврдија дека 13 од повредените се во тешка состојба. Најголем дел од повредените биле пренесени во болниците во Сливен, додека останатите се згрижени во Јамбол и Бургас.
Трагедијата потсетува на неколку големи верижни несреќи што во изминатите години се случиле на бугарските автопати.
Во октомври 2015 година, во тунелот „Витиња“ на автопатот „Хемус“, во судир на околу 50 возила загинале три лица, а 14 биле повредени.
Во јули 2017 година, кај Вакарел на автопатот „Тракија“, во верижен судир на повеќе од 40 возила загинало едно лице, а над 30 биле повредени.
Слична несреќа се случила и во февруари 2019 година на автопатот „Струма“, кога во густа магла се судриле повеќе од 20 возила. Тогаш загинало едно лице, а 14 биле повредени.
Бугарските надлежни служби продолжуваат со истрагата за денешната трагедија, додека екипите на терен работат на отстранување на оштетените возила и расчистување на автопатот.