МЕКСИКАНСКИОТ производител на текила „Бекло“ објави четирикратно зголемување на профитот во вториот квартал, потпомогнат од послабиот песо. Приходите на најголемиот светски производител на текила се зголемија за 2,8 проценти на 11,6 милијарди песоси (625 милиони долари) во вториот квартал.
Нето добивката скокна на 2 милијарди песоси. „Растот беше во голема мера поттикнат од повисоките оперативни приходи и нето финансиските приходи“, соопшти мексиканската компанија, наведувајќи ја послабата локална валута што ја поддржува продажбата во САД и Канада, кои се деноминирани во песоси.
Мексиканската валута ослабе за околу 2,6 проценти во однос на доларот во последните 12 месеци, забележува „Ројтерс“. „Бекло“ генерираше речиси 60 проценти од својата нето продажба во САД и Канада минатата година, со уште 25 проценти на домашниот пазар.
Покрај брендот „Хозе Куерво“, групацијата произведува и други брендови на текила, како и жестоки пијалоци како што се мескалот „Крејенте“, вискито „Странахан“, румот „Кракен“ и џинот „Будлс“. САД му се заканија на Мексико со царини од 30 проценти, но министерот за трговија Хауард Лутник во неделата сигнализираше дека и текилата ќе биде ослободена од новите царини.
Минатата година, Мексико беше меѓу земјите што забележаа најголем суфицит во трговијата со САД, дури 171,8 милијарди долари, според податоците на Министерството за трговија на САД, што е за 12,7 проценти повисоко отколку во 2023 година.
