Над 50 лица се хоспитализирани во болниците во Ниш и Пирот со симптоми на труење со амонијак, но никој од нив не е опасен по живот, јавуваат српските медиуми, повикувајќи се на последните информации од болниците. Едно лице почина, но нема потврда дека причината за неговата смрт е труење со амонијак, јави државната телевизија РТС.
Полицијата ги повика локалните граѓани да не ги напуштаат своите домови и да не излегуваат надвор. Училиштата, градинките и институциите денеска се затворени.
Во Пирот е прогласена вонредна состојба. Градоначалникот на Пирот, Владан Васиќ свика итна прес-конференција и објасни дека вонредната состојба е прогласена во моментот кога отровниот облак се надвиснал над градот поради ветерот што дувал кон Пирот. Тој рече дека 20 вагони се полни со амонијак, а еден или два излетале од шините и истекувале амонијак.
Цистерна падна во реката Нишава и се очекува тоа да има последици по флората и фауната. Од реакцијата на амонијакот со водата се создава густ чад и засега тешко се приближува до локацијата.
Пристапот до местото на несреќата е затворен во пречник од четири километри.
Во прекин е и железничкиот сообраќај, како и сообраќајот на магистралниот пат меѓу Пирот и Бела Паланка поради димната завеса и слабата видливост. Поради лошата видливост на овој дел од автопатот се судрија неколку автомобили.