Израелскиот премиер Бенјамин Нетанјаху изјави дека планот за преземање контрола врз Газа Сити е клучот за завршување на војната и целосен пораз на Хамас. Во петокот, израелскиот безбедносен кабинет одобри проширување на воените операции во појасот Газа, потег кој предизвика критики од генералниот секретар на ОН, Антонио Гутереш, кој предупреди дека тоа ќе донесе дополнителни присилни раселувања и жртви, како и продлабочување на „веќе катастрофалната состојба“ за милиони Палестинци.
Во Израел, десетици илјади граѓани протестираа против планот, а семејствата на заложниците во рацете на Хамас стравуваат дека таквите акции ќе ги доведат во поголема опасност нивните најблиски.
Нетанјаху ја отфрли критиката, нагласувајќи дека целта на Израел не е окупација на Газа, туку ослободување од, како што ја нарече, „геноцидната организација“ Хамас. „Граѓаните на Газа нè молат нас и светот да бидат ослободени од Хамас,“ изјави премиерот, додавајќи дека ниту една држава не би прифатила постоење на вооружена група која е „посветена на нејзино уништување“ во непосредна близина.
Тој ја претстави и петточковната стратегија на Израел за завршување на војната:
- Разоружување на Хамас
- Враќање на сите заложници
- Демилитаризација на појасот Газа
- Израелско „преовладувачко безбедносно присуство“ во регионот
- Создавање „алтернативна цивилна администрација“ која нема да биде ниту Хамас, ниту Палестинската управа.
Според Нетанјаху, војната може да заврши ако Хамас ги ослободи заложниците и целосно ги положи оружјата.