Македонските државјани кои во моментов престојуваат во Обединетите Арапски Емирати ќе имаат можност да се вратат во земјава со нов организиран евакуациски лет што е планиран за вторник на релација Дубаи – Скопје, информираат од македонската амбасада во Абу Даби.
Од дипломатското претставништво апелираат до сите граѓани кои имаат итна и приоритетна потреба од враќање во Македонија, во најкус можен рок да се пријават за да бидат вклучени во организацијата на летот.
„Во тек се финалните подготовки и координација за реализација на летот, поради што е важно заинтересираните граѓани навремено да се евидентираат во Амбасадата на Македонија во Абу Даби“, соопштија од амбасадата.
Пријавувањето може да се направи преку телефон на бројот +971 56 441 7532 или преку електронската адреса abudabi@mfa.gov.mk.
Според информациите од дипломатското претставништво, досега се реализирани четири организирани евакуациски летови од регионот на Блискиот Исток, со кои во земјава се вратиле вкупно 458 патници.
