Резултатите од мерењата на можна контаминација со токсични материи во областа на падот на товарен авион со муниција во близина на северниот грчки град Кавала во средината на јули не даваат причина за никаква загриженост, јави АНА-МПА, повикувајќи се на денеска објавени информации за инспекцијата што ја изврши грчкото Министерство за животна средина и енергетика.
Товарниот авион Ан-12, управуван од украински оператор, се урна на обработливо земјиште во близина на Кавала на 16 јули на пат од Србија кон Бангладеш. На бродот имало над 11 тони муниција. Сите осум членови на екипажот загинаа.
Во извештајот од увидот се вели дека сите опасни материи откриени на подрачјето се на многу ниско ниво, а дури и оние кај кои се измерени повисоки вредности биле во дозволените граници.
Примероците од почвата и вегетацијата беа земени уште на 17 јули, ден по несреќата. Подоцнежните тестови беа направени и од регионалните власти во радиус од 3,5 километри, вклучувајќи ги и изворите на вода.
Забележано е позначајно отстапување за олово, каде што е пронајден вишок од 20,4 проценти во споредба со вредностите во „новата холандска листа“, но нивоата биле многу пониски од оние за кои е потребна акција. Вредностите на манган и титаниум, исто така, дополнително ќе се истражат, но тие се исто така далеку од нивоата што би можеле да предизвикаат загриженост.