Добро подготвената патна аптека може да биде од голема помош за време на летниот одмор, особено ако се појават неочекувани здравствени проблеми. Освен редовната терапија за лицата со хронични заболувања, експертите препорачуваат во куферот да се најдат и основни лекови и медицински помагала за итни ситуации.
Според препораките на Федералната асоцијација на германски фармацевтски здруженија (ABDA), патната аптека треба да содржи лекови против дијареја, препарати за симптоми на настинка, како што се кашлица и болно грло, лекови против горушица и други дигестивни тегоби, како и лекови против болка и покачена температура.
Покрај лековите, се препорачува да се понесат термометар, средство за дезинфекција на помали рани, фластери, стерилни облоги, еластични и фиксирачки завои, како и препарати за третман на истегнувања, извртувања и модринки.
На списокот со неопходни работи се и крема за сончање, средство против инсекти, маст за побрзо заздравување на рани, капки за очи и уши, спреј за нос и хартиени марамчиња.
Фармацевтите советуваат во патната аптека да има и ножици за прва помош, ракавици за еднократна употреба или заштитни маски, бидејќи можат да бидат корисни во различни ситуации.
Доколку патувањето вклучува подолги возења или пловидба, препорачливо е да се понесат и лекови против гадење. За лицата кои страдаат од сезонски алергии, се советува во багажот да има и антиалергиски препарати.
Ако планирате престој во природа, особено во шумски или планински предели, експертите препорачуваат да понесете пинцета или специјална алатка за безбедно отстранување крлежи, со што ќе бидете подготвени и за вакви непредвидени ситуации.