Во Соединетите Американски Држави повторно се отвора политичка расправа за регулација на онлајн сексуалната индустрија. Дел од конзервативните пратеници предлагаат воведување нов специјален данок на порнографската содржина, што би ги погодило најголемите платформи и креаторите на ваков тип материјал.
Иницијативата предвидува порнографските страници што работат во одредени федерални држави да плаќаат седум проценти данок на заработениот приход, како и годишна такса од 500 долари. Собраните средства, според предлагачите, би биле наменети за финансирање програми за ментално здравје на адолесцентите и заштита на малолетниците од експлицитни содржини.
Предлогот се вклопува во трендот на засилено регулирање на интернет-содржините во САД, вклучувајќи закони за проверка на возраста пред пристап до експлицитни материјали. Повеќе од половина држави веќе воведоа или разгледуваат слични мерки.
Платформи како OnlyFans и Pornhub овозможија сексуалните работници да работат онлајн и да допрат до публика без посредници, но истовремено го олеснија следењето и регулирањето на содржините. Доколку дополнителните даноци станат правило, токму креаторите на содржини би можеле најсилно да ги почувствуваат финансиските последици.
Правни експерти и организации за дигитални права реагираа остро на иницијативата. Според нив, посебен данок врз една категорија содржина може да биде во судир со Првиот амандман на Уставот на САД, кој ја гарантира слободата на говор и изразување. Тие предупредуваат дека мерката тешко ќе ги спречи малолетниците да пристапуваат до порнографија, но ќе создаде дополнителни трошоци и правни спорови.
Доколку законот добие зелено светло, голема е веројатноста да заврши пред суд, каде ќе се расправа за неговата уставност.
