Министерството за труд и социјална политика објави оглас за избор на градежна компанија за изградба на нова детска градинка во скопската населба Драчево, соопшти денеска прес службата на Општина Кисела Вода.
Општината кон крајот на минатата година изработи основен проект за изградба на нова градинка во Драчево, по што аплицираше и доби грант од Министерството за зголемување на капацитетите на јавните детски градинки на нејзината територија.
– Имајќи го предвид фактот дека сегашниот капацитет на објектите за згрижување на најмладата популација во населба Драчево не ги задоволуваат барањата и потребите, односно листите за чекање за упис на деца се предолги, од суштинска важност се наметна потребата за изградба на нова детска градинка во најголемата населба во Општина Кисела Вода, се наведува во соопштението.
Согласно изработениот проект, новата градинка ќе се простира на површина од 600 квадратни метри, со поделена катност од подрум, приземје и еден кат. Во подрумот е предвидена просторија за горилник и остава за огревен материјал. На приземјето ќе се наоѓа главниот влез на градинката, како и четири занимални. На првиот кат се планира да бидат сместени јаслите, како и придружни простории. Вкупниот капацитет на градинката за згрижување ќе биде 125 деца, од кои 95 на возраст од две до шест години и 30 деца до двегодишна возраст.
