Коалицијата на западните земји ја гледа Романија како можна локација за обука на украински пилоти да управуваат со борбени авиони Ф-16. Земјите на НАТО се поблиску до започнување програма која би можела да испрати борбени авиони на украинското небо за неколку месеци, објави Политико, според три лица запознаени со планирањето.
„Романија е едно од местата каде што коалицијата бара да спроведе обука“, рече западен функционер кој, заедно со сегашен и поранешен функционер на американското Министерство за одбрана, зборуваше под услов да остане анонимен.
Во тек е работа на постигнување договор за спроведување обука на пилоти на борбени авиони во Романија, рекоа сегашни и поранешни претставници на Пентагон. Локхид Мартин, кој го произведува Ф-16, најверојатно ќе ја спроведе обуката, додаваат тие.
Портпаролот на Локхид укажа на коментарите на главниот оперативен директор на компанијата, Френк Сент Џон, оваа недела дека компанијата е подготвена да ги обучува украинските пилоти да летаат и да го одржуваат Ф-16 веднаш штом западните земји се согласат да ги испратат.
Деталите за програмата за обука бавно се појавуваат откако претседателот Џо Бајден ги одобри напорите минатиот месец. Холандија и Данска ги предводат мултинационалните напори за обука, но партнерите сè уште не одлучиле кои земји ќе ги обезбедат авионите потребни за обуката.