Поранешниот директор на ЦИА, Џон Бренан, остро ги критикуваше воените напади на претседателот Доналд Трамп врз Иран, оценувајќи ги како „драстично лоша грешка“ што би можела да ги турне Соединетите Американски Држави во уште еден долготраен и разорен конфликт на Блискиот Исток.
Говорејќи во емисијата The Weeknight на мрежата MSNBC, Бренан направи директна паралела меѓу актуелните напади врз Иран и американската инвазија на Ирак во 2003 година, која ја смета за една од најголемите стратешки грешки на современата американска надворешна политика.
„Мислам дека ова е вторпат во овој век Соединетите Американски Држави да направат катастрофална грешка со вклучување во конфликт на Блискиот Исток“, изјави Бренан. „Првпат тоа беше во 2003 година кога го нападнавме Ирак, што предизвика години и години хаос, насилство и тероризам.“
