Во текот на денешниот ден во земјава се регистрирани 46 пожари на отворен простор, од кои 16 сè уште се активни, еден е ставен под контрола, а 29 се целосно изгаснати, информира Центарот за управување со кризи.
Најголем дел од активните пожари се на ниска вегетација, но има и пожари во шуми, пасишта и стрништа.
Активни пожари има во општините Врапчиште, Битола, Прилеп, Гевгелија, Дебар, Тетово, Чашка, Липково, Куманово, Студеничани, Сарај и Долнени.
Во Врапчиште гори ниска вегетација во селото Топлица, во Меџитлија, Битола, гори стрниште, додека во Прилеп има два активни пожари – кај Дата Центарот и над вештачкото езеро. Во Гевгелија пожарот е во мешана шума кај селото Миравци.
Во Дебар активен е пожарот од селото Татар Елевци кон Кораб и кај селото Бањште, каде гори смрека, папрат и трнливи грмушки. Пожар е активен и над Боговинско Езеро на Шар Планина, каде гори пасиште.
Во општина Чашка пожарот е кај селото Јаболчиште, во близина на местото „Биков Гроб“, додека во Липково има два активни пожари во борова шума, кај селата Матејче и Стрима.
Активни пожари има и на повеќе локации во Куманово, како и во Студеничани, Сарај и Долнени.
Пожарот во селото Џепиште, општина Центар Жупа, е ставен под контрола. Таму гореле сува трева и нискостеблеста шума.
Во текот на денот се изгаснати 29 пожари на отворен простор, меѓу кои и во Штип, Кочани, Виница, Валандово, Дебарца, Дебар, Струга, Кичево, Брвеница, Желино, Врапчиште, Гостивар, Бутел, Гази Баба, Шуто Оризари, Аеродром и Зелениково.
Според информацијата на ЦУК, состојбата со пожарите се следи, а надлежните екипи продолжуваат со интервенциите на терен.