Наќе Чулев, поранешен директор на Агенцијата за разузнавање е новиот кандидат на ВМРО-ДПМНЕ за технички министер за внатрешни работи наместо Драган Ковачки кој власта го оспори. Опозицискиот лидер Христијан Мицкоски телефонски разговарал со премиерот Зоран Заев во кој му го предложил новото име, при што тој го прифатлив предлогот. Со тоа утре треба да се одржи собраниската седница за изборна техничката влада. Во соопштението од ВМРО-ДПМНЕ се наведува биографијата на Чулев.
„Наќе Чулев е дипломиран криминалист со постдипломски студии по мир и
развој, на Институт за одбранбени и мировни студии, при Филозофски Факултет на Универзитетот Св. Кирил и Методиј Скопје. Наќе Чулев има богато искуство од областа на безбедносната политика и прашањата од Министерството за внатрешни работи.“, велат од ВМРО-ДПМНЕ.
Наќе Чулев е долгогодишен професионалец и одличен познавач на
безбедносните прашања и ново лице во политиката. Работи во Директоратот за разузнавање на меѓународен тероризам и организиран криминал во Агенцијата за разузнавање. Чулев е и редовен предавач на Дипломатската академија на МНР.
Од владејачката СДСМ рекоа дека предлогот на ВМРО-ДПМНЕ Наќе Чулев да биде технички министер за внатрешни работи е прифатлив, бидејќи како што истакнаа Чулев ги исполнува уставните критериуми.
„Со овој предлог на ВМРО-ДПМНЕ не се крши Уставот, не станува збор за воено или униформирано лице и не е под обвинение. Со тоа се исполнети условите предлогот да оди на гласање во Собранието заедно со целата преодна влада која треба да го спроведе изборите на 12 април.“, велат од СДСМ.
Пред да му го соопшти новото име на Заев, Мицкоски на прес конференцијата рече дека новиот кандидат е професионалец и не е партиски член. Тој истакна и дека изутрината уште еднаш се обидел да го убеди премиерот, за како технички министер за внатрешни работи да го прифати Драган Ковачки, но Заев повторно му укажал дека предлогот го крши Уставот.
„Јас не очекував ниту првиот пат да биде проблематизирано. Кога станува збор за исплашените СДСМ Заев, Спасовски, Шекеринска и останатите се е можно. Можно е и овој пат да најдат некаква точка, запирка која што би била проблематична за нив, само да избегаат од предвремените парламентарни избори, но се надевам дека разумот ќе надвладее кај нив.
Доколку СДСМ го прифати предлогот утре во Собранието треба да се бира техничката влада, откако претходно премиерот Зоран Заев треба да поднесе оставка“, рече Мицкоски.
„Да го видиме предлогот, секако доколку е прифатлив предлогот седница на Собрание ќе се одржи и секако ќе се случи и ќе ја избереме техничката влада и со тоа ќе си поднесе оставка и премиерот Зоран Заев“, вели Костадинов.
Од СДСМ предложени се Оливер Спасовски за технички премиер, Славјанка Петровска за дополнителен заменик министер за внатрешни работи, Санела Шкријељ дополнителен заменик во труд и социјала. Од редовите на опозицијата, ВМРО-ДПМНЕ го предложи Наќе Чулев за технички министер за внатрешни работи, потоа Рашела Мизрахи за технички министер во труд и социјала, Гордана Димитриовска во финансии, Цветан Трипуновски во земјоделство и Невенка Стаменковска технички министер за информатичко општество и администрација. Доколку утре се формира техничката Влада тоа ќе го отвори патот за претседателот на Собранието Талат Џафери да ги распише предвремените избори кои треба да се одржат на 12 април.