Патниците на четири германски аеродроми денеска ќе се соочат со откажувања и одложувања на летови, бидејќи работниците ќе ја напуштат работата во последниот бран штрајкови кои ја погодија најголемата европска економија, јави ДПА.
Штрајковите на аеродромите во Дизелдорф, Келн/Бон, Штутгарт и Карлсруе/Баден-Баден ќе доведат до откажување на 681 лет, соопшти Германското здружение на аеродроми (ГАЛ/АДВ). Ова ќе влијае на околу 89.000 патници.
Синдикатот Верди повика на штрајкови бидејќи разговорите за платите во секторот за воздухопловна безбедност остануваат неуспешни, а спорот за платите во јавниот сектор продолжува.
Според синдикатот, штрајкот на аеродромот во Келн/Бон ќе започне во четврток навечер поради природата на работната смена. Во некои области штрајковите нема да завршат до раните утрински часови во сабота.
Аеродромските оператори ги советуваа патниците да го проверат статусот на летот кај нивната авиокомпанија или тур-оператор пред да се упатат кон аеродромот.