Шведскиот обвинител кој ја надгледува истрагата за истекувањето на гас од гасоводот во Балтичкото Море денеска изјави дека наредил да се затвори областа, пренесе Асошиетед прес.
„Го разбирам големиот јавен интерес, но ние сме на почеток на прелиминарна истрага и затоа не можам да навлегувам во детали какви истражни дејствија преземаме“, изјави обвинителот Матс Љунгквист, задолжен за предистражната постапка за „осомничени голема саботажа“, синоќа.
Шведската крајбрежна стража соопшти дека на бродовите, нуркачите, риболовните и подводните бродови им е забрането да се приближуваат на помалку од 9,3 километри од двете истекувања во близина на шведскиот брег.
Во текот на викендот, данските власти соопштија дека истекувањето од гасоводите Северен тек 1 и 2 престанало.
Меѓутоа, шведската крајбрежна стража вчера соопшти дека нејзиниот авион пријавил дека помалото истекување на „Северен тек 2“ пораснало на околу 30 метри во дијаметар. Властите не кажаа зошто се зголемило истекувањето. Според крајбрежната стража, другото истекување, на Северен тек 1, престанало.
Минатата недела, цевководи беа оштетени во подводни експлозии во близина на брегот на Шведска и Данска, што предизвика истекување на метан.