Македонскиот пијанист од светски глас, Симон Трпчески, постигна уште еден голем меѓународен успех настапувајќи на 3, 4 и 5 септември на престижните сцени во Токио. Со оваа концертна серија, Трпчески симболично одбележа две децении од своето деби во Јапонија, повторно настапувајќи со Токискиот Метрополитен симфониски оркестар под диригентската палка на маестро Казуши Оно.
На сцените во распродадените Токио Метрополитен театар и Сантори салата, Трпчески го изведе монументалниот „Концерт бр. 3“ од Сергеј Рахмањинов, каде што публиката го награди со овации и двоен бис. Кулминацијата се случи на третата вечер за време на неговиот рецитал во салата „Јамаха“, каде по изведбите на дела од Чајковски, Бетовен, Равел и Прокофјев, македонскиот виртуоз дури пет пати беше враќателен на бис.
Во знак на благодарност, Трпчески изведе обработки на познати јапонски песни, како и композицијата „Не си го продавај Кољо чифликот“ од Димитрије Бужаровски. Оваа изведба ја посвети на сите жртви од земјотреси, истакнувајќи ја историската јапонска помош за Скопје и силното македонско-јапонско пријателство.
Според информациите од „КултурОп“, по успесите во Европа и домашните настапи во Охрид и Битола, Трпчески заминува за Загреб. Таму, на својот роденден, ќе ја отвори новата сезона на Загрепската филхармонија со изведба на „Концертот бр. 1“ од Рахмањинов, под палката на полскиот диригент Давид Рунц.