Кинеската валута, која Пекинг вештачки ја одржува на ниско ниво, секоја година ја чини германската економија милијарди евра изгубен раст, покажува најновата проценка на економските експерти од Келн.
Студијата на Германскиот економски институт (IW), изработена по нарачка на Сојузното министерство за надворешни работи на Германија, покажува дека германскиот бруто-домашен производ (БДП), прилагоден на цените, би можел да биде за 0,3 отсто поголем до 2028 година, доколку вредноста на јуанот се утврдува праведно.
Ауторите на студијата во официјалното соопштение наведуваат дека оваа разлика би претставувала добивка од околу 43 милијарди евра во периодот од 2026 до 2028 година.
Како Пекинг диригира со курсот?
За потребите на економската симулација, вредноста на јуанот била ревалоризирана за 40 отсто, што според мислењето на експертите приближно одговара на неговата реална вредност.
Институтот заклучува дека Кина применува специфични тактики на пазарот:
- Државна контрола: Пекинг не дозволува слободно формирање на курсот, туку управува со валутниот систем под строга државна контрола.
- Евтин извоз: Со намерното потценување на јуанот, кинескиот извоз станува вештачки поевтин и поконкурентен на светскиот пазар.
- Скап увоз: Од друга страна, ваквата политика го прави увозот на странски стоки во Кина значително поскап.
Ова е една од главните причини зошто вредноста на германскиот извоз во Кина бележи значителен пад, додека увозот на кинеска стока во Германија нагло расте. Како резултат на тоа, трговскиот дефицит на Германија со Кина се искачи на околу 90 милијарди евра во 2025 година.
Придобивки и за самата Кина
Според студијата, од реалното вреднување на валутата корист би имала и самата Кина. Пореалистичен курс на јуанот би помогнал во подобро урамнотежување на кинеската економија, која во моментов е премногу зависна од извозот.
Иако кинескиот БДП во почетокот би претрпел пад поради намалениот извоз, симулацијата предвидува брзо закрепнување благодарение на растот на домашната побарувачка.
Бидејќи извозот би станал помалку привлечен, повеќе стока би останувала на домашниот пазар, што би придонело за намалување на цените за домашните потрошувачи. Експертите од IW истакнуваат дека овој раст на домашната побарувачка во голема мера би го компензирал падот на извозниот суфицит во рок од неколку години. До 2028 година, кинеската економија речиси би го достигнала нивото од почетниот сценарио со потценета валута, но на многу постабилни нозе.