Иран потврди дека го добил американскиот план од 15 точки, но Техеран го смета за неприфатлив.
Според извор, планот што Вашингтон го испратил до Иран е опишан како „екстремно максималистички и неразумен“, додека некои медиумски извештаи, како што тврди тој, не ја пренесуваат веродостојно неговата вистинска содржина.
„Она што е прикажано во некои медиумски извештаи не ја одразува точно суштината на предлогот“, рече изворот.
Тој додаде дека планот „ниту на хартија не изгледа добро“, нарекувајќи го заведувачки и измамен во начинот на кој е претставен.
Истиот извор тврди дека Иран, за разлика од другата страна, „точно знае што сака и што решително ќе отфрли“, оценувајќи дека американската страна постојано ги поместува границите на своите барања.
Според Ал Џезира, изворот, исто така, рекол дека од 28 февруари немало индиректни разговори меѓу Иран и САД, туку дека пораките се разменети преку повеќе посредници.
Овие тврдења доаѓаат по претходните извештаи дека Пакистан го пренел американскиот предлог до Техеран и дека Исламабад или Анкара би можеле да бидат меѓу можните локации за можни разговори за деескалација на војната.
Сепак, засега пораките од Техеран се дека нема формални преговори и дека фокусот останува на одговор на американско-израелската воена кампања и дефинирање на сопствените црвени линии.