Американскиот претседател Доналд Трамп вчера го именуваше гувернерот на Луизијана, Џеф Ландри, за специјален американски пратеник за Гренланд, големата данска полуавтономна територија за која претходно изјави дека САД треба да ја преземат.
„Џеф разбира колку Гренланд е суштински за нашата национална безбедност и силно ќе ги унапредува интересите на нашата земја во (обезбедувањето) на безбедноста, сигурноста и опстанокот на нашите сојузници, а всушност и на светот“, рече Трамп објавувајќи го назначувањето.
На почетокот од својот втор мандат во Белата куќа, Трамп постојано повикуваше САД да ја преземат контролата врз Гренланд и не ја исклучи можноста за употреба на воена сила за да ја преземат контролата врз богатиот со минерали арктички остров.
Прашањето беше релативно мирно во последните месеци, но во август, данските власти го повикаа американскиот амбасадор на разговори по извештаите дека најмалку три лица со врски со Трамп вршат тајно влијание на Гренланд. Порано оваа година, американскиот потпретседател Џ.Д. Венс посети оддалечена американска воена база во Гренланд и ја обвини Данска дека недоволно инвестира на островот.
Трамп претходно рече дека Гренланд е клучен за безбедноста на САД и не ја исклучи можноста за преземање на островот со сила, иако Данска е сојузник на САД во НАТО.
Лендри ја презеде функцијата гувернер на Луизијана во јануари 2024 година, а неговиот мандат завршува во јануари 2028 година.
Во објава на X.com вчера, Ландри рече дека е „чест“ да му служи на претседателот на оваа „доброволна позиција да го направи Гренланд дел од Соединетите Американски Држави“ и дека тоа не влијае на неговата позиција како гувернер на Луизијана.
Данска и Гренланд претходно изјавија дека островот не е на продажба и ги осудија извештаите за собирање разузнавачки информации од страна на САД за него. На притисокот на САД за Гренланд се спротивставуваат Русија и поголемиот дел од Европа.
Данската амбасада во Вашингтон не одговори веднаш на барањата за коментар за назначувањето на Ландри.
Данската воена разузнавачка служба во извештај објавен претходно овој месец изјави дека САД ја користат својата економска моќ за да „ја наметнат својата волја“ и да се закануваат со воена сила врз пријателите и непријателите.
Во својот годишен извештај, службата, исто така, наведува дека зголеменото наметнување на САД под администрацијата на Трамп се случува во исто време додека Кина и Русија се обидуваат да го намалат влијанието на Западот, а особено на САД.
„Стратешката важност на Арктикот расте, а конфликтот меѓу Русија и Западот се интензивира, а растечкиот безбедносен и стратешки фокус на Арктикот од страна на САД дополнително ќе ги забрза овие случувања“, се вели во данскиот извештај.