Американскиот претседател Доналд Трамп продолжи со остри критики кон поглаварот на Католичката црква, папа Лав, продлабочувајќи ја јавната размена на ставови околу војната, Иран и миграциските политики.
Во објава на својата социјална мрежа Truth Social, Трамп повика „некој да му каже на папата Лав“ за убиствата на демонстранти во Иран, додавајќи дека е „апсолутно неприфатливо Иран да поседува нуклеарно оружје“.
Овие изјави доаѓаат во контекст на зголемени тензии на Блискиот Исток. На 28 февруари, САД и Израел извршија напади врз Иран, по што Техеран возврати со напади кон Израел и неколку земји од Заливот каде има американски бази. Во ескалацијата, илјадници луѓе загинаа, а милиони беа раселени.
Иако западните земји долго време се сомневаат дека Иран има амбиции за развој на нуклеарно оружје, Техеран тоа го негира, повикувајќи се на своето членство во Договорот за неширење на нуклеарно оружје. Од друга страна, се смета дека Израел е единствената држава на Блискиот Исток која поседува нуклеарно оружје.
Коментарите на Трамп следуваат откако папата Лав претходно предупреди на ризикот од „лизгање на демократиите во тиранија“. Во писмо објавено од Ватикан, тој нагласи дека демократиите остануваат стабилни само ако се засноваат на силни морални вредности.
Папата исто така ја критикуваше одлуката на Трамп за започнување воени дејствија против Иран, истакнувајќи дека Бог не ги прифаќа молитвите на оние кои водат војни и имаат „крвави раце“. Дополнително, тој ја оцени како неприфатлива заканата на Трамп за уништување на иранската цивилизација и одби да се приклучи на иницијативата „Одбор за мир“ за Газа.
Верскиот лидер повика и на „длабоко преиспитување“ на односот кон мигрантите во САД, во време кога администрацијата на Трамп спроведува строга имиграциска политика.
Во неделата, Трамп го нарече папата „слаб“ и „ужасен“ кога станува збор за криминалот и надворешната политика, со што дополнително ги заостри односите меѓу двајцата.
