Претседателката на Европската комисија, Урсула фон дер Лајен, објави дека таа и уште 15 европски комесари денеска се во Киев на средба со членовите на украинската влада, јавија ДПА.
„Тука сме заедно за да покажеме дека поддршката на ЕУ за Украина останува силна“, напиша Фон дер Лајен на Твитер.
Претседателот на Европскиот совет, Шарл Мишел, се очекува утре да пристигне во Киев на средба со украинскиот претседател Володимир Зеленски, забележува ДПА.
Високи функционери на Европската унија ја остваруваат својата дводневна посета на Украина, откако украинската влада соопшти дека очекува патоказ од ЕУ за тоа како треба да започнат формалните преговори за членство.
Приклучувањето кон ЕУ е исклучително сложен процес кој вклучува низа законодавни реформи и усогласување на националното законодавство со европското право.
Украина доби статус на кандидат за ЕУ минатото лето. На состанокот во Киев, европските претставници се очекува да признаат дека Украина постигнала одреден напредок во некои области, како што се судските реформи. Се очекува да се разговара и за формите на краткорочна и долгорочна помош.
„Пристигнав во Киев за да им ја пренесам на сите Украинци кои ја бранат својата земја најсилната порака за поддршка на ЕУ“, напиша шефот на европската дипломатија, Жозеп Борел на Твитер.
