Косовскиот адвокат Арианит Коци, кој со недели протестира поради неспособноста на политичките партии да го конституираат новиот состав на Собранието на Косово, денеска направи симболичен и драматичен потег – ја ишиша својата коса пред камерите, по што им се обрати на новинарите со порака дека државноста на Косово е сериозно загрозена.
„Државноста на Косово ни е загрозена, па нашите пријатели и непријатели се убедуваат дека не сме способни да одржуваме држава. Ова веќе не е политика, туку влегува во категоријата параполитика. Затоа, барам Собранието веднаш да се формира денеска, а овој протест не е само за политичарите и пратениците, туку и за сите луѓе кои заспале и се во колективна депресија. Не заборавајте – без Собрание нема демократија, без Собрание нема економски и социјален развој, без Собрание нема држава“, вели тој.
Според него, ова не е само протест против политичарите, туку и повик за будење на граѓаните од, како што рече, „колективната депресија“. Коци предупреди дека без функционално Собрание нема демократски процеси, нема економски и социјален напредок, и, најважно – нема држава.
Адвокатот секојдневно присуствува пред зградата на Собранието, протестирајќи при секој нов обид за конститутивна седница. Минатата недела, неговиот протест привлече внимание кога се појави со магариња – симболичен израз на револт и иронија за политичката состојба во земјата.
Инаку, денеска во Приштина се одржува веќе 50-тиот обид за конституирање на новиот парламентарен состав, седница која сè уште е во тек.
Косово се наоѓа во политички ќор-сокак по одржаните избори, бидејќи партиите не успеваат да се договорат околу формирањето на парламентарното мнозинство и изборот на новиот претседател на Собранието.
