Воздушен лет на „Рајанер“ од Загреб кон Малме се претвори во вистински кошмар за патниците, откако непосредно пред слетувањето избувнала жестока тепачка помеѓу двајца мажи, при што биле повредени и други патници.
Видео-снимка од инцидентот, која денеска беше објавена на социјалните мрежи, покажува брутални сцени на насилство – удирања, викање и паника во преполната кабина. Според сведочења, ситуацијата излегла од контрола за неколку секунди.
„Непосредно пред слетувањето, светлата се изгаснаа, а двајца мажи почнаа да се тепаат. Паѓаа врз други патници. Имаше многу деца и жени кои плачеа, луѓето паничеа и се обидуваа да избегаат кон задниот дел на авионот. Имаше крв насекаде“, раскажа еден од патниците за локалните медиуми.
Друг патник опиша: „Лицето на едниот маж беше целосно покриено со крв. Тепачката се случуваше веднаш до мене и мајка ми. Беше застрашувачки – се уште се тресам.“
По слетувањето на аеродромот во Малме, патниците биле итно евакуирани, а на местото пристигнала полицијата, која го истражува инцидентот. Засега не е познато дали има приведени лица.
Полицијата во Шведска потврди дека е покрената истрага, а првичните информации укажуваат дека може да станува збор за насилство предизвикано од личен конфликт меѓу патниците.
Видеото можете да го погледнете ТУКА
