Владимир Путин положи заклетва во Кремљ, со што официјално го започна својот петти мандат како претседател на Русија.
Инаугурацијата на рускиот претседател традиционално се одржува во Големата палата на Кремљ, а новиот стар претседател положи заклетва во присуство на членови на владата, парламентот, судии на Уставниот суд, други државни функционери и јавни личности. .
„Кога ги извршувам овластувањата на претседателот на Руската Федерација, се колнам дека ќе ги почитувам и штитам правата и слободите на човекот и граѓанинот, ќе го почитувам и бранам Уставот на Руската Федерација, ќе ги штитам суверенитетот и независноста, безбедноста и интегритетот на Руската Федерација“, рече Путин при изговарањето на заклетвата.
Тој потоа им се обрати на граѓаните, нагласувајќи дека е убеден оти Русите „достоинствено ќе го поминат овој тежок, пресвртен период и ќе станат уште посилни“.
Како што рече, судбината на Русија сами ќе ја одредат заради сегашните и идните генерации.
Тој им се заблагодари на сите Руси во сите региони на Федерацијата, особено на оние што „се борат за татковината“.
На претседателските избори одржани во март во Русија, Путин се кандидираше како независен кандидат и освои повеќе од 87 отсто од гласовите.
Владимир Путин помина речиси четвртина век како руски лидер.
