Босанските власти започнаа истрага по ненадејната смрт на 46-годишната Алма Хускиќ, една од најпознатите ТВ водителки во Босна и Херцеговина. Нејзиното безживотно тело било пронајдено утринава во стан во градот Зеница. Околностите за трагичниот настан сè уште не се разјаснети, пренесуваат регионалните медиуми.
Полициски екипи веднаш излегле на терен по добивањето на пријавата и започнале увид. Засега официјалната причина за смртта останува непозната.
Лејла Екиновиќ, портпарол на Министерството за внатрешни работи на кантонот Зеница-Добој, го потврди случајот:
- На местото на настанот е пронајдено тело на женско лице со иницијали А.Х., родена 1978 година.
- Истрагата ја водат службеници од Секторот на криминалистичката полиција.
- По завршување на сите неопходни вештачења и истражни дејствија, ќе бидат познати повеќе информации за точната причина за смртта.
Три децении во светот на новинарството
Алма Хускиќ беше едно од најпрепознатливите лица на РТВ Зеница, каде ја градеше својата кариера скоро 30 години. Нејзиниот професионален пат започна од новинар-соработник, па сè до уредничка позиција, оставајќи длабока трага во локалното и регионалното новинарство.
Гледачите ќе ја паматат по нејзината работа на терен, репортажите за „Зеница Инфо“, како и по водењето и уредувањето на емисии од различен карактер – од информативни програми до содржини посветени на културата и секојдневниот живот.
Професионални достигнувања
- Долгогодишен уредник на Ревијалната програма на Телевизија Зеница.
- Член на уредничкиот колегиум на информативната програма.
- Поранешен дописник за дневниот весник „Ослобоѓење“.
- Уредник на младинското списание „ОМ“, издавано од хуманитарната организација UMCOR за време на војната во Босна и Херцеговина во 1990-тите.
