Меѓупартиски обвинувања меѓу СДСМ и ВМРО-ДПМНЕ во однос на поддршката на земјоделците. Од опозициската партија велат дека СДСМ нема исплатено субвенции од 2017 година, а дека доцнат и со субвенциите за 2018 и 2019 година.
„Со години чекаат и стотици земјоделци по разни ставки исплати за надомест на штета од големите временски непогоди. Заев вети и сигурен откуп и високи откупни цени. Четири години родот завршува на буниште, а земјоделците без леб. Власта ништо суштински не им помогна на земјоделците. Само лаги и многу фалби, без резултати. Време е за промени. Време е за Македонија за сите луѓе“, реагираат од ВМРО-ДПМНЕ.
Претходно, од СДСМ се пофалија дека Владата предводена од СДСМ како вистински сојузнук на земјоделците и сточарите е целосно посветена на активни политики за нивна поддршка и поттик.
„Агенцијата за финансиска поддршка на земјоделството и руралниот развој само изминатава недела исплати над 617 милиони денари субвенции на фармерите кои имаа обележани грла говеда, кози, како и 182,3 милиони денари на сите фармери кои задржале женско јагне. Со оваа исплате се префрлени и средства за тутунопроизводителите во висина од 11.4 милиони денари. Исплатена е и финансиска поддршка за засеани површини со сертифициран семенски материјал, како и исплата на субвенции за пчеларство. Досега се исплатени 5,5 милијарди денари, а со усвоениот ребаланс до крајот на годинава се очекува рекордна исплата од 115 милиони евра за над 66.000 земјоделци“, велат од СДСМ.