Европа се соочува со еден од најинтензивните топлотни бранови во последните години, додека таканаречената „топлотна купола“ ги зголемува температурите и до 46 степени Целзиусови. Бројот на жртви расте, а експертите предупредуваат на сè поголем ризик од катастрофални последици.
Причина за екстремните горештини е маса на врел воздух која од Сахара се движи кон север, поттикната од силен систем на висок воздушен притисок познат како африкански антициклон. Метеоролозите објаснуваат дека овој феномен го заробува топлиот воздух над западна и централна Европа, предизвикувајќи постојан пораст на температурите од ден на ден.
Франција бележи алармантни последици. Од 18 јуни, дури 40 лица го загубиле животот давејќи се додека се обидувале да се разладат, а властите наведуваат дека најголем дел од жртвите се млади луѓе. Премиерот свикал итен кризен состанок, додека службите ги предупредуваат граѓаните да избегнуваат капење на небезбедни места како реки и езера.
Топлотниот бран не создава проблеми само за граѓаните, туку и за енергетската инфраструктура. Во Франција привремено бил исклучен реактор во нуклеарна електрана во близина на Тулуз, бидејќи водата од блиската река станала премногу топла за безбедно ладење на системот.
Електраната Голфеш, која ја користи водата од реката Гарона, забележала температури над безбедносниот праг од 28 степени, поради што операторите морале да го намалат работењето. Експертите предупредуваат дека ваквите проблеми може да станат сè почести доколку топлотните бранови продолжат да стануваат поинтензивни.
Трагедии се регистрирани и во Германија, каде за време на викендот најмалку пет лица загинале во несреќи поврзани со капење. Слични извештаи пристигнуваат и од други делови на Европа.
Во исто време, Велика Британија беше погодена од силни невремиња и обилни врнежи, со околу 3.000 удари од гром во Лондон за само два часа. Сепак, метеоролозите предупредуваат дека тоа било само најава за нов топлотен удар, бидејќи земјата во текот на неделата очекува можни рекордни температури.
Топлотниот бран веќе ги однел и животите на најранливите. Во Франција, две мали деца на возраст од две и четири години биле пронајдени мртви во автомобил. Причината за смртта сè уште се утврдува, но властите не го исклучуваат влијанието на екстремните температури.
Здравствените и социјалните служби низ Европа се под голем притисок. Домовите за стари лица воведуваат итни мерки, а персоналот постојано ги проверува корисниците за да спречи дехидратација.
Температурни рекорди се рушат и во текот на ноќта. Франција ја забележала најтоплата ноќ откако се води евиденција, со просечна температура од 21,6 степени Целзиусови измерена на 30 мерни места низ земјата.
Шпанија речиси целосно е под предупредувања поради високите температури кои надминуваат 40 степени. Властите предупредуваат на зголемен ризик од пожари и воведуваат строги мерки за заштита.
Во Италија, 15 градови се под највисок степен на тревога, додека Белгија и Германија исто така бележат екстремни услови и нарушувања во сообраќајот и секојдневното функционирање.
Ниту транспортната инфраструктура не останува поштедена. Железничките мрежи низ Европа се соочуваат со ограничувања, а властите им препорачуваат на граѓаните да ги одложат патувањата и, каде што е можно, да работат од дома.
Експертите предупредуваат дека ваквите екстремни временски појави повеќе не се исклучок, туку сè почеста појава, а проценките се дека во иднина можат да станат уште почести и поразорни.