Балкан

Вучиќ: Новата власт не може да ме толерира во Собранието, или ќе ме уапсат или ќе се обидат да ме убијат

Вучиќ: Новата власт не може да ме толерира во Собранието, или ќе ме уапсат или ќе се обидат да ме убијат

Александар Вучиќ најави дека нема да го заврши целиот пратенички мандат во Народното собрание на Србија, истовремено упатувајќи остри критики кон новата власт предводена од „Студентската листа“. Тој тврди дека политичките противници не можат да го прифатат неговото присуство во парламентот и дека би можеле да посегнат по радикални мерки против него.

Обраќајќи се на собраниската седница, Вучиќ изјави дека очекува обиди за негово политичко отстранување, па дури спомена и можност за апсење или физичка ликвидација.

„Или ќе се обидат да ме убијат, или да ме уапсат, или пак да донесат закон за лустрација – што Иванка Поповиќ веќе го најавува – бидејќи кога не можете да се справите со политички противник, дури и кога тој е во опозиција, и кога не можете да го победите со знаење и аргументи, тогаш морате да посегнете по такви мерки“, изјави Вучиќ.

Тој најави дека дефинитивно нема да остане во Народното собрание до крајот на мандатот, бидејќи смета дека е време да им отстапи простор на помладите политичари.

Сепак, нагласи дека нема намера да се повлече од политичкиот живот и дека ќе продолжи да биде активен преку средби со граѓаните низ Србија.

„Сметам дека во иднина треба да се потпрете на други луѓе и да им го препуштите местото. Јас ќе им помагам колку што можам на терен, ќе ја обиколувам Србија, ќе разговарам со луѓето и ќе се обидам, во согласност со законот и демократските начела, да ги поразам оние за кои сметам дека го претставуваат најголемото зло за Србија во нејзината модерна историја“, рече Вучиќ.

Во своето обраќање, тој се осврна и на изборниот пораз на Српската напредна странка, оценувајќи дека настапите на претставниците на новата власт покажуваат со кого се соочила неговата партија на изборите.

Вучиќ го критикуваше и обезбедувањето парламентарно мнозинство, посочувајќи дека новата власт, и покрај поддршката од пратениците на малцинствата, едвај успеала да обезбеди присуство на 126 пратеници.

„Доволно беше само да ги слушнете нив – не нас, туку нив. Исто како што беше доволно тоа што денес, дури и со поддршка од пратениците на малцинствата, едвај стигнаа до 126 пратеници во 10 часот. Толку за сериозноста и одговорноста“, изјави Вучиќ.

Ноќно студио

Најнова епизода

Една година од почетокот на судењето за „Пулс“ – кои одговори ги чекаат родителите? | Ноќно студио

Сите епизоди →
Имате вест, приказна или проблем? Пишете ни