Цените на нафтата денеска пораснаа на меѓународните пазари до 85 долари, поддржани од намаленото производство во САД поради поларниот бран и надежите дека олеснувањето на мерките за корона во Кина ќе ја оживее побарувачката за гориво.
На лондонскиот пазар цената на барелот по пладне беше повисока за 56 центи во однос на затворањето на трговијата на крајот на минатата недела и изнесуваше 84,48 долари. На американскиот пазар со барелот се тргуваше за 35 центи поскапо, по 79,91 долари. Пазарите во Велика Британија и САД беа затворени во понеделникот поради божиќниот празник.
Со недели трговците очекуваат олеснување на строгата кинеска политика на нулта толеранција кон Ковид, што ја запре економската активност и мобилноста на граѓаните и ја намали побарувачката за гориво.
Во понеделникот, кинеската Национална здравствена комисија објави дека од 8 јануари посетителите од странство повеќе нема да имаат потреба од карантин, што сигнализира олеснување на граничните ограничувања кои во голема мера се затворени од 2020 година. „Трговците и инвеститорите дефинитивно се надеваа на таков потег“, рече Наем Аслам од Avatrade.
Најавената промена на кинеските епидемиолошки мерки им помогна на акциите, додека доларот ослабна, јакнејќи ја куповната моќ на купувачите на нафта со други валути, а со тоа и побарувачката.
Трговците се загрижени и за Русија
Цените на нафтата беа поддржани и од загриженоста поради прекините на снабдувањето во САД предизвикани од зимските бури, рече Казухико Саито од Fujitomi Securities. „Но, времето во САД треба да се подобри оваа недела, што значи дека цените можеби нема да растат многу подолго“, истакна Саито.
Од петокот, долж брегот на Мексиканскиот Залив, затворени се капацитетите кои преработуваат околу 1,5 милиони барели нафта дневно. Замрзнати се и капацитетите за производство на нафта и гас од Северна Дакота до Тексас, што го намали снабдувањето.
Трговците се загрижени и за можното намалување на руското производство. Поради ограничувањето на цената, Русија би можела да го намали производството на нафта следната година за пет до седум отсто, изјави во петокот вицепремиерот Александар Новак, цитиран од новинската агенција РИА.
Поради празникот, Организацијата на земјите извознички на нафта во понеделник не ја објави цената на барел од нафтената кошничка на нејзините членки. Минатиот четврток изнесуваше 81,14 долари.