Нема прекршувања на законите ниту мешање на државната со партиската активност, уверува премиерот Оливер Спасовски одговарајќи на новинарско прашањето дали секојдневните посети на градилишта, проекти, изведби на патишта не се во име на актуелната изборна кампања. Покрај Спасовски, деновиве се поинтензивно можат да се забележат министрите и други актуелни функционери. При денешната посета на изградбата на градинка во скопско Волково тој истакна дека ќе продолжат да прават увид на градежни работи на проекти кои се градат со буџетски пари и дека тоа нема ништо заедничко со партиските активности.
„Ние како Влада ќе одиме ќе ги промовираме ќе ги презентираме сите проекти што ги градиме. А, по 16,30 ќе ме видите и мене на терен каде што ќе ја водат политичката битка, но тоа е нешто друго. До 16 и 30 секој ден на секое место како што правев сите овие 8 месеци во Владата, како што правев изминатите 3 години во Министерството за внатрешни работи секогаш кога тоа е во интерес на граѓаните да градиме, да создаваме да правиме проекти кои што се од интерес на граѓаните“, истакна Оливер Спасовски.
Деновиве Антикорупциска порача министрите и други носители на јавни функции, државните активности да не ги користат во изборни цели и да се почитува законот.
„Не може да се одржуваат јавни настани по повод започнување на изградба или пуштање во употреба на објекти со средства од Буџетот или од јавни фондови, или со средства на јавни претпријатија или други правни лица што располагаат со државен капитал, во инфраструктурата како патишта, водоводи, далноводи, канализација, спортски игралишта и други објекти или објекти за општествени дејности училишта, градинки и други објекти“, посочуваат од Антикорупциска комисија.
Спасовски во улога на премиер претпладнето беше во скопско Волково во увид на изградбата на детска градинка, а попладне како кандидат за пратеник и носител на кандидатската листа на СДСМ во втората изборна единица на средби во општина Ѓорче Петров.
.