По 20 дена во кои партиите и коалициите ја претставуваа својата понуда пред граѓаните, денеска завршува изборната кампања и од полноќ почнува изборниот молк пред одржувањето на предвремените парламентарни избори,закажани за в среда.
На последниот ден од изборната кампања, партиите ќе се обидат да ги придобијат гласовите на граѓаните преку презентирање на нивните програми што ги ветуваат за следниот четиригодишен период.
Коалицијата „Можеме“ предводена од СДСМ ќе ги заокружи изборните активности во Битола, а претходно ќе ја посети скопската општина Кисела Вода, додека опозициската ВМРО-ДПМНЕ која ја предводи коалицијата „Обнова за Македонија“ ќе биде во Штип, Пробиштип и Карбинци.
Демократската унија за интеграција заедно со нејзиниот кандидат за прв премиер Албанец Насер Зибери и кандидатите за пратеници во сите шест изборни единици ќе одржи прес-конференција пред Собранието, а кај фонтана во Градскиот парк во Скопје своите кандидати завршно ќе ги претстави и ГДУ. Коалицијата „Никогаш северна, само Македонија” ќе ја заврши изборната активност во Охрид, а во Битола обраќање ќе има и носителот во ИЕ 5 и лидерот на Единствена Македонија Јанко Бачев.
На полноќ почнува изборниот молк по што веќе од утре почнува гласањето, кое годинава за првпат ќе трае три дена поради актуелната ситуација со корона вирусот.
Според Роковникот за одржување на изборите, утре ќе гласаат оние кои се во домашен карантин заради позитивен тест на КОВИД 19 и лицата на кои им е определена мерка самоизолација. Тие ќе гласаат во своите домови, а гласањето ќе го спроведе посебен избирачки одбор формиран од ДИК.
.