Најмалку три експлозии се слушнаа во западниот украински град Лавов, околу 6.30 часот по локално време, јави Скај њуз.
Украинската телевизија 24 објави кратко видео на Телеграм, каде може да се види како чад се крева над хоризонтот.
Градоначалникот на Лавов, Андреј Садовиј потврди дека експлозиите биле во подрачје на аеродромот. Но, тој на Телеграм напиша дека аеродромот не е погоден. Според него се работи за зграда до аеродромот.
Зградата е идентификувана како погон за одржување на авиони. Градоначалникот рече дека активната работа на погонот претходно била прекината.
Садовиј упати повик до граѓаните да не споделуваат фотографии од место каде имало експлозија.
Лавов се наоѓа близу полската граница. Откако инвазијата почна, стотици илјади бегалци минуваат низ градот, со цел да стигнат на безбедно.