Грчката влада е подготвена да и го даде на Украина ракетниот систем за воздушна одбрана со долг дострел С-300 ПМУ1 и други советски ракетни системи од нејзиниот арсенал, доколку САД се обврзат да го распоредат системот Патриот на Крит.
„Ако САД го распоредат „Патриот“ на островот Крит и ако овој систем се интегрира во нашиот систем за воздушна одбрана, С-300 може да оди во Украина. Истото важи и за другите системи за противвоздушна одбрана од советско потекло, како што се Тор-М1 и ОСА-АКМ“, изјави грчкиот министер за одбрана Николаос Панајопулос, цитиран од порталот Балканска безбедносна мрежа.
Грција во својот арсенал ги има американскиот систем за противвоздушна одбрана „Патриот“ и рускиот С-300, кој некогаш го зеде од Кипар. С-300 ПМУ1 со максимален домет од 120 километри се користи за заштита на Крит и другите острови од честите прекршувања на воздушниот простор од турските борбени авиони Ф-16.
Украина е многу заинтересирана да го добие системот за противвоздушна одбрана С-300 бидејќи има искуство со нив и затоа што може многу брзо да почне активно да ги користи.
Грција има вкупно 8 самоодни фрлачи С-300 ПМУ1.
Најавата за можноста за испорака на С-300 на Украина претставува малку промена во политичкиот став, бидејќи министерот Панајотопулос во декември силно ја отфрли можноста за таков исход, велејќи дека на Грција очајно и треба оружјето поради заканата од Турција. .
„Нема да испраќаме системи за противвоздушна одбрана од нашите острови или противбродски ракети, без разлика колку тоа го сака Украина, бидејќи и ние се соочуваме со реална закана… Она што ни треба, што ни е корисно и е во оперативна готовност – не планираме да го дадеме. Ќе ни дадат нешто подобро од С-300? Па, да видиме што се нуди“, рече тој ова лето.
Министерот рече дека конечната одлука зависи и од ветената брзина на распоредување на алтернативен систем за противвоздушна одбрана на Крит. „Бидејќи и тоа е важно. Ако тоа е нешто што ќе биде достапно за две години и треба да подариме нешто што е активно за нас во моментов, тогаш тоа не е понуда што можеме да ја прифатиме“, рече Панајотопулос.