На гробиштата во населбата Арбана во градот Призрен, југозападно Косово, пронајдени се човечки останки на жртва од последната војна во Косово во 1998-1999 година, објави весникот „Коха диторе“.
Човекот чии останки беа пронајдени најверојатно е на списоците на исчезнатите во војната. Ова го потврди косовската владина комисија за исчезнати лица, додавајќи дека се пронајдени останките на најмалку едно лице, а местото каде што е ископано е меѓу локациите предвидени за истражување оваа година.
Ископувањето во Призрен доаѓа по завршувањето на работите во селото Биштажин (Бистражин), југозападно Косово, каде, според комисијата, е потврдено постоењето на масовна гробница.
Досега таму се пронајдени коските на четворица жртви од војната во Косово, една жртва беше откриена на почетокот на октомври , а последната – минатата недела.