Во последниот во серијата инциденти откако Израел вети дека ќе дозволи непречен премин на хуманитарна помош во окупираниот Појас Газа, израелските демонстранти денеска ги блокираа камионите со хуманитарна помош што се упатија кон палестинската енклава фрлајќи пакети со храна на патот.
Четворица демонстранти, меѓу кои и малолетник, се уапсени на контролниот пункт Таркми, западно од Хеброн на окупираниот Западен Брег, потврдија адвокатите кои ги застапуваат уапсените демонстранти, пренесува Ројтерс.
Видеата објавени на интернет покажуваат дека демонстрантите фрлаат пакети со храна и лабави кутии на патот.
Минатата недела четири лица беа уапсени во јужен Израел по сличен протест на Израелците кои се противат на испораката на хуманитарна помош во областите контролирани од милитантната група Хамас.
„Со оглед на инцидентите што се случија денеска, надлежните служби покренаа истрага која резултираше со апсење на неколку осомничени. Истрагата е во тек“, се вели во соопштението на израелската полиција.
Израел се соочува со силен меѓународен притисок да дозволи повеќе испораки на хуманитарна помош во Појасот Газа, а меѓународните организации предупредија на сериозна хуманитарна криза која се заканува на населението од повеќе од два милиони луѓе заробени во окупираната и уништена палестинска енклава.
Во неделата, израелските власти најавија отворање на нов премин на северот на Појасот Газа, а наскоро треба да биде отворено и привременото пристаниште што го градат САД.