Повеќе од 50 сантиметри снег паднаа во популарните скијачки центри во југоисточна Австралија.
Во градот Фолс Крик на северо-источниот дел на Викторија во изминатите 24 часа паднале 45 сантиметри снег, а во последните седум дена повеќе од 70 сантиметри. Менаџерот на планината Булер и скијачкиот центар Мт Стирлинг, Дејвид Кларк изјави дека снегот непрекинато паѓа од петокот навечер, пренесува Гардијан.
На планината Хотам до утринава паднаа 31 сантиметар снег, а на север, во ски-центарот Тредбо, во текот на ноќта паднаа 27 сантиметри снег. Метеоролозите предвидуваат дека во следните десет дена би можеле да наврнат уште 50 сантиметри снег.
Студениот бран што се движи низ Јужна Австралија кон Викторија, Нов Јужен Велс и Квинсленд донесе снег, снежна бура и рекордно ниски температури, пренесува Танјуг.
