Американскиот претседател Доналд Трамп повтори денеска дека САД ќе продолжат со тестирања на нуклеарно оружје, но не одговори директно на прашањето дали тоа ќе вклучува традиционални подземни нуклеарни тестови кои биле чести за време на Студената војна.
„Ќе дознаете многу брзо, но ќе спроведеме некои тестирања“, рече Трамп пред новинарите во претседателскиот авион Air Force One додека леташе кон Палм Бич во Флорида, одговарајќи на прашање за подземните нуклеарни тестови.
Трамп најави враќање на американските нуклеарни тестови по 33 години.
„Другите земји тоа го прават. Ако тие го прават, и ние ќе го правиме, ок?“ – рече Трамп во четврток и додаде дека наредил на американската војска веднаш да го рестартира процесот за тестирање на нуклеарно оружје по пауза од 33 години, што изгледа како порака до Кина и Русија, конкурентските нуклеарни сили.
Трамп ја објави оваа информација на својата социјална мрежа Truth Social додека со хеликоптерот Marine One леташе на средба со кинескиот претседател Си Џинпинг во Пусан, Јужна Кореја.
Не е јасно дали имал предвид тестирања на нуклеарна експлозија, кои би ги спроведувала Националната администрација за нуклеарна безбедност, или тестирања на летање на проектили кои можат да носат нуклеарно оружје. Ниту една нуклеарна сила, освен Северна Кореја (последниот пат во 2017 година), не извршила тестирање на нуклеарна експлозија повеќе од 25 години.