Зоран Заев со вчерашната изјава се закани кон медиумите и кон сите оние кои имаат намера да ги изнесуваат на виделина неговите и криминалите на неговото раководство, оценија од опозициската ВМРО-ДПМНЕ. Оттаму обвинуваат дека Заев не сака да се реши скандалот Рекет и дека ги штити сите оние кои се вмешани во случајот.
На ваквата реакција се јавија од СДСМ од каде велат дека опозициската ВМРО-ДПМНЕ нема право, како што велат да шири лицемерна грижа за новинарството кога во нивно време вршеа упади во телевизии, се апсеа новинари и се затвораа медиуми. За изјавата на Заев во кој споменува суетен новинар, велат дека тоа воопшто не е притисок кон слободата на изразување.
За изјавата на Заев, Фадиљ Зендели смета дека се работи за избрзана и нервозна реакција на премиерот и наместо да дава такви несоодветни изјави тој порачува Заев енергично да дејствува во борба против корупцијата.
И Зијадин Села лидерот на Алијанса за Албанците оценува дека се работи за несоодветна изјава на еден премиер.
Побаравме коментар и од коалицискиот партнер во Владата, ДУИ за тоа како тие гледаат на изјавата на премиерот, но оттаму не добивме одговор.
РЕПОРТЕРКА: СВЕТЛАНА УНКОВСКА