Главниот град утринава е обвиткан со густа магла и високо ниво на аерозагадување.
Според најновите мерења, Скопје се наоѓа на 24. место на листата на најзагадени градови во светот, со индекс на квалитет на воздухот од 114 US AQI, што се категоризира како „нездраво за чувствителни групи“.
Концентрацијата на ПМ2.5 честички во моментов е 8,1 пати над годишната гранична вредност препорачана од Светската здравствена организација, што претставува сериозен ризик за здравјето, особено за децата, повозрасните лица, хронично болните и лицата со респираторни и кардиоваскуларни заболувања.
Здравствените препораки укажуваат на потреба од намалување на физичките активности на отворено, особено утринските часови кога маглата и загадувањето се најизразени. Граѓаните се советуваат да ги држат прозорците затворени со цел да се избегне влез на загаден надворешен воздух во домовите.
За чувствителните групи се препорачува носење заштитна маска при престој на отворено, како и користење прочистувачи на воздух во затворен простор. Надлежните институции апелираат на внимателност и следење на официјалните информации за квалитетот на воздухот, додека траат ваквите неповолни атмосферски услови.
