Министерството за внатрешни работи (МВР) вечерва излезе со итно соопштение за серија проблеми на патната мрежа низ државата. Одрони, поплави и сообраќајни несреќи го отежнуваат, а на одредени места и целосно го блокираат движењето.
Драма кај тунелот „Бадар“
Најфреквентниот патен правец, автопатот Скопје – Велес, е делумно блокиран. Во 17:35 часот пријавено е дека по тунелот „Бадар“ се случил голем одрон на карпа. Според МВР, карпата ги има зафатено двете коловозни ленти.
„Сообраќајот не е во целосен застој, но се одвива отежнато. На лице место има полициски службеници и екипа од ’Македонија пат’ кои работат на расчистување“, информираат од полицијата.
Црна Река го отсече селото Бучин
Обилните врнежи предизвикаа излевање на Црна Река кај крушевското село Бучин. Од 18:05 часот во целосен прекин се локалните патни правци кои го поврзуваат ова село со околината:
- с. Бучин – Демир Хисар;
- с. Бучин – с. Обршани;
- с. Бучин – с. Трноци.
Забрани за камиони и затворени патишта
Полицијата информира и за други ограничувања:
- Струга – Ќафасан: Од 18:15 часот воведена е забрана за движење на тешки товарни возила (камиони) кон граничниот премин.
- Пробиштип – Леговец: Овој патен правец од 18:30 часот е целосно затворен за сообраќај во двата правци поради сообраќајна незгода и вршење на полициски увид.
Од МВР апелираат до граѓаните за максимална внимателност, почитување на сообраќајната сигнализација и задолжително поседување на зимска опрема, со оглед на лошите временски услови.