Незадоволството на вработените во Македонска Пошта денеска прерасна во организиран протест низ целата држава. Причина за реакцијата е доцнењето на платата, која до 23 јануари сè уште не им е исплатена.
Претседателот на синдикатот во Македонска Пошта, заедно со вработените, соопшти дека протестите ќе продолжат сè додека не се изврши исплатата. Менаџментот бил известен и дека доколку следната плата не биде исплатена до 15 јануари, протестите ќе почнат веднаш, а како опција не е исклучен ниту целосен штрајк на вработените.
Претседателот на ССМ, Слободан Трендафилов, изјави дека „нема работа без плата“ и притоа додаде дека вработените биле изложени и на притисоци да не учествуваат на протестите.
Вработените посочија дека покрај доцнењето на платите, работат и во лоши услови – без греење, без основна опрема, а дел од просториите содржат азбестен материјал.
Протестот не е ограничен само на Скопје. Вработени во повеќе градови низ државата денеска излегоа пред објектите на Македонска Пошта со истото барање – исплата на заостанатата плата.