Собранието денеска избра нов судија на Уставен суд на Република Северна Македонија, откако со 63 гласа „за“, седум „против“ и без воздржани пратениците ја поддржаа кандидатурата на Гоце Наумовски. По гласањето, Наумовски даде свечена изјава пред пратениците, обврзувајќи се дека функцијата ќе ја извршува совесно и одговорно и дека ќе ги почитува Уставот и законите.
Изборот следува по оставката на уставната судијка Јадранка Дабовиќ-Анастасовска, која во декември минатата година се повлече од функцијата поради здравствени и лични причини.
Наумовски е редовен професор по римско право на Правниот факултет „Јустинијан Први“ при Универзитет „Свети Кирил и Методиј“ – Скопје и надворешен соработник на премиерот Христијан Мицкоски од областа на правото. Тој е брат на поранешниот вицепремиер за евроинтеграции Васко Наумовски.
Предлогот за негов избор го поднесе претседателот на собраниската Комисија за прашања за изборите и именувањата, Ѓорѓија Сајкоски од ВМРО-ДПМНЕ, кој истакна дека Наумовски има импресивна биографија и кредибилитет за извршување на функцијата. Комисијата го утврди предлогот без дискусија и со мнозинство гласови.
Од СДСМ претходно оценија дека станува збор за кадровско решение од кабинетот на премиерот и обвинија за намера за контрола врз судството и обвинителството. Од ВМРО-ДПМНЕ возвратија дека Наумовски не е партиски член, туку угледен професор, посочувајќи дека претходните предлози на СДСМ биле партиски решенија.